Bugun Farg‘ona politexnika institutining Tibbiy xizmat ko‘rsatish punktida "Men donorman" xayriya aksiyasi bo‘lib o‘tdi. Ushbu tadbir institut va Farg‘ona viloyat qon quyish markazi hamkorligida tashkil etildi.Aksiya doirasida inson hayotini saqlab qolish va sog‘lom jamiyatni shakllantirishga hissa qo‘shish maqsadida qon topshirish targ‘ib qilindi. Institutning professor-o‘qituvchilari, ma’muriy-xo‘jalik xodimlari hamda talabalari ushbu ezgu tashabbusda faol ishtirok etdilar.Tadbirning asosiy maqsadi — yoshlar va ta’lim muassasasi xodimlari orasida sog‘liqni saqlash madaniyatini oshirish, jismoniy sog‘lomlikning ahamiyati to‘g‘risida ma’lumot berish, qon donorlari safini kengaytirish va ijtimoiy mas’uliyatni shakllantirishdan iborat bo‘ldi.“Bugungi aksiyada men ham qatnashdim. Boshqa bir bemorning hayotini saqlab qolishga oz bo‘lsa-da hissa qo‘sha olish — bu men uchun g‘urur va mas’uliyatdir”, — deydi institutimiz Yoshlar yetakchisi Madadbek Hojiboyev.Tadbir davomida qon donorligi haqida ta’limiy ma’lumotlar, tibbiy xavfsizlik choralarining muhimligi, qon topshirishning fiziologik va ijtimoiy foydalari haqida maxsus axborot-modullar orqali tushuntirishlar berildi.Ushbu tashabbus nafaqat sog‘liqni saqlash xizmatlaridan foydalanishni rag‘batlantirdi, balki yosh avlodda insonparvarlik, hamjihatlik va fuqarolik mas’uliyati kabi qadriyatlarni mustahkamlashga xizmat qildi.